UNIVERSI PARALLELI

Premessa: In questi ultimi anni la fantasiosa teoria degli "universi paralleli" sta' cominciando a dimostrarsi realta'. Cerchiamo assieme di vedere se anche Grado ha creato i suoi "universi paralleli.

" Ùndeze piani "

Che tu dizi conpare, ‘ndaremo a pìco ?

Ma de siguro !…se i và ‘vanti cussì  a costruì, prima o dopo Gravo ‘ndarà a fundi !

E no’ tu vìghi… ogni giorno i alsa ‘na gru e via, là che gera giusto un picolo albergo de do o tre piani sòlta fora un condominio de dieze o quindeze piani !

Ùndeze conpare, ùndeze… comò le squadre de balon…

Sì, magari i farà domanda per tredeze o quatordeze ma ‘l Comun: “niet”, solo ùndeze piani… i oltri i và in panchina !

Eh, si, tu schersi tu compare, ma quà le robe le xe serie… la storia l’insegna e seculi fà, cô i s’ha mèsso a costruì Gravo su’l sabion e su’l fango, l’unica roba granda opur òlta gera ‘l canpanil e la basilica, ‘chè i saveva che ‘l teren varave cedùo soto de ‘n peso cussì enorme.

Vàra là, Sant’Agata e San Gotardo le xe dute soto aqua perchè sì, el livelo de’l mar el s’ha alsao, ma anche per via de i cediminti de’l teren : miga un scherso !

Ciò, ma alora xe per quel che i ha fàto el Tissiano cussì grando, perchè de l’aqua se salvarà solo ili, quii che i ‘stà su i piani òlti !

Mah, che tu vòl che te digo… xe miera e miera de tonelae de peso tra duti ‘sti novi alberghi e condomìnii e le falde aquifere che slàva ‘l teren, co’ due ‘ste meze aluvion che ogni tanto te capita e co’i spandiminti de i scarighi fognari e de i tubi de l’aqua mezi ruti de siguro no’ và a giutà le fondamenta che li tien in pie…gargun dize che zà un palasson de quii alti sacramentai el xe un poco inclinao, no’l xe più a pionbo…
Ustia, conpare ! … che varèno anche noltri a Gravo la Tore de Pisa ? …tu te imagini che publissitàe ?… i vignarave a miera a vèghe ‘sta nova maravegia e cussì varàveno più turisti e più soldi de incassà !

Si… e vendaràveno anche i “gages”, co’ foto ricordo, cartuline e dute quele oltre macacade de plastica made in Cina… ma và là !
Comunque, pe’ serà la question, te digo solo che pe’ scaramansia me me tegno la mia batelina co’l “gionson” de sie cavali senpre a posto, senpre pronta, ‘che no’ se sà mai…che ceda ‘l teren o che vegna l’aqua òlta me resto senpre a gala e no’ me bagno !

T’ha ragion compare, ragion de vende… però forsi ‘desso sarave megio de tornà a casa, che me pàr stàga vignindo sù un tenporalon de quii numero un:
sà, pe’l Meteo i ha dào mundi piova …

*                              *                            *