Grado spot

“ Co’ i lupi “

‘I dìse che tu devi stà scierao co’ i lupi,
‘chè co’ le piègore tu môri;
anco tu devi sièlge ‘l branco, i tovi pari
ch’ ‘i sîa cofà de tu e no più forti,
sinò de drio, in canton, tu devi stà,
in mezo a i veci opur quii squasi morti.

No’ xe razon che tièn, no’ vâl discursi
che pôssa fà valè la to’ parola,
missiao xe solo astussia co’ la forsa
pronta pe’ de ciapàsse la so’ preda:
‘chè xe la vita aval un bosco, ‘na foresta
e a turno duti quanti ‘i la travêrsa.

E cô a spartî le carne xe la lòta
bisogna fâsse ‘vanti, vê coragio,
mostrà i artigi, i dinti e dâ un gran bàgio
pe’ fâsse respetà, pe’ vê ‘l comando
e sostegno portà a casa pe’l to’ sangue
de continuà ‘l to’ vìve su ‘sto mondo.

Ma duti miga ‘i pòl d’êsse dii lupi,
no’i pòl ganbiasse ‘l seme o la sostansia
e ‘lora pe’ no diventà la preda ,
pe’ fâ ‘l so’ soravive meno duro,
i ciàpa oni zornada a la bisogna
o ‘i còre a drio scòndesse d’ un muro.