Grado spot

Da Giovanni Marchesan "Stiata"
ecco un'altra breve storia ...

Gno nona me conteva che un serto Giovanni Marchesan, morto ormai da ani e ani, una sera dei Santi ’l s’ha rabiao co’ la femena perché la veva vista preparâ i lumini pe'i morti (se meteva l’ogio inte'i bicieri co’ un stopìn in meso). "Fémena, lassa stâ quî lumini! Ai morti no ’i ocore ninte oramai. Pensa pitosto ai vivi e co’ quel ogio fà un bon boreto !" "Ma Giovani, vemo senpre fato cussì e anche i nuni dei nostri nuni i feva cussì; no se deve lassâ pêrde le tradissiòn!" Ma no xe stao ninte de fâ: ninte ogio per i morti. Giovani el veva anche rason; infati miseria no ne mancheva, tanto che i sùrisi i vigniva fora dei armeri de la cusina co’ le làgreme inte'i oci. La fèmena l’ha dovùo ubidî e per quel ano i morti no i ha vuo i lumini. Quela sera i Marchesan i ha magnao un boreto comò che Dio comanda e, dopo vê pregao el rosario, i xe ’ndai in leto. Verso mesanote ha scuminsiao un sbatèo de porte e de scuri, un câge de tecie in cusina, biceri e cìchere che i coreva pe'l pavimento... Insoma: un finimondo, tanto che Giovani co’ la fèmena e i màmuli i ha dovùo alsâsse de'l pagiòn e vignî zò in strada. E che gera? Gera el Strànsito, i morti in processiòn, che se vendicava co’ elo ! Eh, no se deve mancâ de rispeto ai morti ! E in casa dei Marchesan, dopo quela volta, per i Santi, prima vien l’ogio pe'i morti e dopo quel pe'i vivi!