03 giu 2013

The lagoon



“ Crose desmentegae”

Và la batèla pian, xe tenpo belo,
l’aqua se ‘ngrespa ‘pena,
 la fâ mantelo
e caressando i àrzeni la và
co’ tóco lieve, lassando drio ‘na sìa
che spècia ‘l sielo.

‘L caneo se move un giosso
e là, sora ‘l baroso óro d’un fosso,
vissin d’un tameriso ‘pena nato,
sconte de drio d’un ciapo de canele
che drite ‘stà e no’ le se move,
spuntà se veghe, rùsene, do crose.

Gnissun recorda,
gnissun che cônta più de quela storia
de quando la buriana de ‘l inverno
portao via la s’ha do àneme sù in sielo.
Do vite grame, dure, distinae
co’ poco de ‘stâ ben: desfortunae.

Pensâ pe’ la famegia gèra ‘l so’ crùssio
e a pèsca o càssia ‘ndà no’ feva conto,
basteva portà a casa la zornada
pe’ fà cuntinti i figi che a la sera,
la pansa meza svoda e ‘l cavo pien de fiabe,
ficài sóto i nissioi ‘i se ‘ndormenseva.

E pe’ fâ ‘l megio, podè ‘ndà a cavo olto,
volùo ‘i ha tentao de fà ‘l più ben,
ma duti ‘i sâ: ‘l inverno no ‘l perdona,
no ’l ‘scolta miga preghiere a la Madona…
e cussì ‘l vento, ‘l fredo, ‘l mar e ‘l fango
se li ha portai co’ ìli in t’un momento.

No’ ve la cônto me quela desgrassia:
candele e insenso in Ciesa ormai xe distuai…
No’ vôgio mutigà de quii duluri
 ‘chè  ‘desso solo ‘l so’ mondo li recorda
e che, ‘nte’l tenpo duto ‘l ano,
intorno e frischi ‘i pôrta i più bei fiuri…

4 commenti:

Alien ha detto...

grassie a tu Bruno pe'l preciso comento su quela tragedia...
Un saludo,
Aldo

Alien ha detto...

Ciao Aldo, bilissimi i versi de la croze d'i do pòvari cristiani, negai int'una note de tormenta e i sovi sighi che ciameva agiuto, portai da la buora fin in Stiusa, duta Gravo ha sintìo. E gnissun ha podùo fa ninte pre salvali: un se ciameva Zusto Dovier e 'l oltro Gaetano Scaramuzza. La data infausta,14 de fevraro de 'l 1931.
E te saluda, Bruno

03 giugno 2013 15:04

Anonimo ha detto...

Mundi bela....la te strenze 'l cuor.

Teti Ciao Aldo e ciao Bruno

Alien ha detto...

ciao Teti...