30 mar 2013

Grado spot



A ‘l sior proto de la stanperia

Se ‘visa ‘l proto de la stanperia
che, dovendo stanpà in graisan,
stà ‘tinti no se deve a ‘l ortografia
comò la Crusca, che ciàcola in toscan.
Do P, do T, do R mal le starave
in tapo, fruto, guera al dî nostran;
se deve fàle dopie  in usso e in asso,
comò mastrùsso, lusso,  giossa e brasso.

Anca pre no ‘ndà co’l toscanismo
ma continuà la nostra antiga usanza,
(e questo ‘nte le scuole sarave barbarismo)
plural e singolar và ben ‘bastansa;
‘ntè’l favelà in graisan zusto se pòl a dî
“Quii ‘i rîe”…sensa de fâ ‘na maldicensia,
‘chè “Quei ridono” …’i dìse duti là in Fiorensa:
ma a quà la pratica fà ‘l uso e la sentensia.
La parola “cussì”,  co’ oltre tante

e pre cavà ogni ‘quivoco a i leturi,
ciàma do ss  …’chè un no xe bastante;
bisogna de segnà “cusì” pre i sarturi,
cucìre” scrivarave un bon cruscante…
ma pre no fâve  de ‘stà quà fin a doman
‘na roba sola dìgo e no me ‘ntrìgo:
comò ‘l se ciàcola ‘l và scrìto, el graisan !

26 mar 2013

10 mar 2013

GRADO Festival

Festival  2013...

5 mar 2013

Grado spot




“ Bestiario “


Serai comò le bestie drio d' un recinto i’ stà
‘spetando primavera e ‘l tenpo belo,
'chè pùo  la colda istae de siguro ‘riverà
e soldi a palae la portarà de mète in burcelo.

Drento ‘sta cheba xe liuni, vulpi e lionfanti,
co’ aquile, sgrapiuni, tigre e sirpinti
ch’ i’ se fà guera tra d’ ìli duti quanti
che pàr no’ esista posto ‘ndola vìve,
‘ndola d’ êsse logai in pase, buni e cuntinti.

Gargùn che sbrana, gargùn che ‘l invelena,
gargùn che fràca co’ la so’ possansa,
gargùn fâ ‘l sgàgio, d’ un furbo sorafìn...
pùo xe de quii che no’ tu i’ tien ‘l passo
pe’ via de i sovi artigi ch’ i’ sbrèga e i’ fà un sanguasso.

E più ch’ i’ se conbàte de più in meno i’ rèsta,
più ch’ i’ se firìsse e côpa tra d’ ìli  e più ‘l côre ‘l sangue
che ‘l se desperde via ‘nte la corente
de ‘st’ aqua de ‘sto mar senpre più scuro…
che al fìn sora ‘sto lìo no’ restarà più zente.